अति उदार तो सदा नादार भाग एक

“तसं नाही ओ, पण काही खर्च हे टाळता येत नाहीत ना! आणि आता मुलंही मोठी झालीत त्यामुळे नाही म्हटलं तरी काही गोष्टी कराव्याच लागतात ना?” मीनाताईंच्या स्वरात एक अस्वस्थ अजीजी होती. आता नवरा काय म्हणेल याची धास्तीही त्यांना लागून राहिली होती. खर्चाचा विषय काढला की दिनेशराव एकदम भांडायलाच उठत, त्यामुळे घरात एखादी वस्तू संपली किंवा काही नवीन विकत आणायचं म्हटलं की मीनाताईंना प्रचंड मानसीक ताण येत असे आणि त्यांच्या जीवाची उगाच कालवा कालवा सुरू व्हायची, पण काही गोष्टींमध्ये त्यांचाही नाईलाज होता. घर संसार म्हटलं की रोजच काही ना काही लागतं आणि काही काही खर्च असे असतात की ते टाळताच येत नाहीत. म्हणूनच मनात नसूनही आज दिनेशराव संध्याकाळी ऑफिस मधून परत आल्याबरोबर मीनाताईंनी त्यांच्यासमोर खर्चाची गोष्ट काढली आणि अंदाजाप्रमाणे दिनेशराव डाफरलेच.