प्रिया आज माझी भाग २०

खरेतर ती काल तडकाफडकी निघत होती तेंव्हा त्याला तिला सांगायचे होते की त्याने त्याचा निर्णय सांगितला याचा अर्थ असा नव्हता की तिने लगेच तिथून निघून जावे.
पण तिने भविष्यात त्याच्याकडून कसलीही अपेक्षा ठेऊ नये म्हणून त्याने घटस्फोटाचे कागद तयार करूनआणले होते. कायद्याप्रमाणे त्याला इतक्या लवकर घटस्फोट मिळणार नाही याचीही त्याला पूर्ण कल्पना होती. या प्रोसेसला वर्ष लागणार हे त्याच्या वकिलांनी त्याला आधीच संगीत होते आणि त्याबाबतीत तो मिहिकाशी बोललाही होता. म्हणून ती इथे वर्षभर राहिली तरी त्याला काही हरकत नव्हती. त्याचे आणि तिचे संबंध फक्त दिखाव्यासाठी आहे हे त्याला तिला सांगायचे होते.