बंडू मेला...

"कुठे जात आहे? तुमच्या त्या टिंगल्या वर्तमानपत्राच्या ऑफिसमध्ये जात आहे. मी पुन्हा पुन्हा फोन करते, म्हणून फोन बंद करून ठेवला आहे त्या डुक्कराने. सकाळपासून लोकांनी इथे माझा जीव हैराण करून सोडला आहे. दिवसभर किती लोक आले म्हणून सांगू? कोणी अगरबत्ती घेऊन येत होते, कोणी फुले घेऊन येत होते. ती दुसऱ्या वाड्यावरची सटवी सुनिता, तुमच्यासाठी जाईची फुले घेऊन आली होती. म्हणते कशी, 'माझ्या बंडूला जाईची फुले फार आवडायची म्हणून खूप शोधून आणली आहेत.' तीच फुले माळून पाठवली तिला. आणि तो तुमचा मित्र पांडू तर तिरडीचं सामान घेऊन आला होता. त्याच बांबूने त्याला असं बडवलं म्हणून सांगू, पाठीचा कणा मोडला नसेल तर शप्पथ." सीमा चंडिकेचा अवतार धारण करून सांगत होती.