लव आज कल भाग दोन

“हो पण मघाशी तू केलेले पोहे अगदी मस्त जमले होते आणि चहाही अगदी फक्कड होता बरं का.” दिवाणखोलीतलं वर्तमानपत्र आणायला गेलेल्या मनोजच्या कानावर हे शब्द पडले आणि परत त्याच्या डोक्यात राग शिरला. तो मनोमन विचार करत होता.

“आपली आई आपल्या वडिलांची किती काळजी घेते. त्यांच्या खाण्यापिण्याच्या वेळा सांभाळते. त्यांच्या आवडीनिवडीकडे विशेष लक्ष देते. आणि इथे तर सगळी बोंबाबोंब. काहीही म्हटलं की मीराचं उलट उत्तर तयारच. माहित नाही आयुष्यातला तो कोणता क्षण होता, नशिबाला ग्रहण लागलं होतं की भद्रा सुरू होती. मला या बाईची भुरळ पडली आणि मी तिच्या प्रेमात वेडा होऊन लग्नाचा निर्णय घेतला. काही म्हणण्या-बोण्याची तर सोयच नाही. प्रत्येक प्रश्नाचे उत्तर तिच्याकडे असतं.