आभाळाएवढी तिची माया. भाग - १

चिंटू आणि बबली हे दोघंही शिलाच्या लहान्या दिराची मुलं होती. तिलाही एक मुलगा होता पण तो मोठा होता, त्यामुळे तो स्वतःचं स्वतः सगळं करायचा. पण चिंटू आणि बबली दहा वर्षाचे होते, दोघेही जुळे होते. शिलाची लहान जाऊ निशा ही नोकरी करत होती त्यामुळे चिंटू आणि बबलीला लहानपणापासून शिलानेच सांभाळलं होतं आणि आताही तिच त्या दोघांचं सगळं काही बघत होती. त्यांचं एकत्र कुटुंब होतं. सुरूवातीला सगळं काही छान होतं. पण हल्ली निशाचं वागणं बदलत चाललं होतं. शिलाने मुलांचे जास्त लाड केलेले तिला आवडायचं नाही. आताही शिला मुलांना भरवत असताना निशाने ते पाहिलं आणि तिला शिलाचा राग आला.