आरती सहस्त्रबुद्धे (अंतिम भाग) (भाग-३)

"हो मग! मला नव्हते करायचे तिच्याशी लग्न. माझे तुझ्यावर प्रेम होते. आईला तुझ्याविषयी सांगितले होते तरीही तिला बाबांचे वचन पूर्ण करण्याची हौस होती. त्या आरतीचा बॉयफ्रेंड होता तर तिने लग्नाला नकार द्यायला हवा होता ना? पण नाही! तिला तर हौस होती माझ्याशी संसार थाटायची. मिरवायचे होते कौस्तुभ शिलेदारची बायको म्हणून... एवढ्यावरच थांबली नाही ती... लग्न झाल्यावर आमच्यात कधी फिजिकल इंटरॲक्शन झाले नव्हते, तरीही ती प्रेग्नंट होती. अर्थात ते बाळ तिच्या प्रियकराचे होते, तिला कल्पना होती; पण हेसुद्धा कळवले नाही तिने मला. उलटपक्षी माझ्या नकळत अबॉर्शन करण्याचा निर्णय घेतला. तिला वाटले की भूतकाळाची सावली ती पुसू शकेल; पण मी तिची माहिती आधीच काढली होती, हे कळायला तिच्याकडे तेवढी अक्कल नव्हती. फक्त एक महिना होता आईकडे... ती असेपर्यंत मला काहीच करता येणार नव्हते, किंबहुना मला काही करायचेही नव्हते म्हणून वाट पाहिली आणि आई गेल्यावर सरळ प्लॅन एक्झिक्युट केला." कौस्तुभ आसुरी हसत गर्वाने म्हणाला.