आरती सहस्त्रबुद्धे (भाग-१)

"अगदी बरोबर. माझाही हाच मुद्दा होता. मी असे विचारल्यावर ती म्हणाली की तिला माहिती आहे मला हिप्नोटाईज करता येते. तिने रेडिओवर माझी मुलाखत ऐकली आणि मदतीसाठी माझ्याकडे ती आली, असे तिचे म्हणणे होते... तर ती म्हणाली मला की मी तिला हिप्नोटाईज करून तिला त्या घटनेबद्दल सविस्तर विचारावे व त्या आमच्यातल्या संभाषणाचा पूर्ण व्हिडिओ रेकॉर्ड करावा, जेणेकरून ती, ते रेकॉर्डिंग पुरावा म्हणून वापरू शकेल किंवा सोशल मिडीयावर तरी व्हायरल करून तिच्या नवऱ्याचा खरा चेहरा जगासमोर आणेल; कारण तिचा दावा होता की त्या घटनेचे दोनच साक्षीदार होते, एक ती आणि दुसरे तिचे बाळ. बाळ तर जिवंत नव्हते म्हणून तिच्या बाळाचा सूड घेण्यासाठी तिने स्वतःला हिप्नोटाईज्ड करून सत्य उघडकीस करण्याचा मार्ग निवडला. एखाद्याला हिप्नोटाईज करून अशा गोष्टी जाणून घेणे, हे खूप जोखमीचे काम असते. याचे साईड इफेक्ट्स असतात, हेसुद्धा मी सांगितले; पण ती ठाम होती. तिचा निश्चय डगमगला नाही." बोलता बोलता शांभवीचे मन त्या केसच्या आठवणीत परत गुंतले. संकेत आता मध्येच प्रश्न न विचारता शांत ऐकत होता.