अगर तुम साथ हो.. भाग ५

"हे आमच्याकडून.. आणि इथे असा ठोंब्यासारखा उभा राहू नकोस. चल तू पण. वहिनी तुम्हीपण यायचं हं थोड्यावेळाने." पार्थ रितेशला नाचायला घेऊन जात म्हणाला. काव्या पुढे न जाता पाठी उभी राहून फक्त बघत होती. पार्थने हळूहळू सगळ्यांनाच नाचायला पुढे घेतले होते. माधवराव, स्मिताताईही नाचत होते.
'हे घर एवढं आनंदात आहे. मला जमेल का यांचा आनंद कायम ठेवायला?' काव्या विचार करत होती. तेवढ्यात पार्थ तिला घेऊन जायला आलाच. त्याने तिचा हात धरून तिला नाचायला लावले. रितेशचे तिच्याकडे लक्ष होतेच. तो पटकन तिच्याजवळ आला.