अहंकाराचा फुगा भाग -१

"आई तुझा वाचनाचा छंद मी जाणतो कितीही व्यस्त असलीस तरी तुझं वाचन सुरूच असतं.
आणि त्यातील वेचे सुद्धा तू लिहून ठेवत असतेस.
अशातच एक दिवस तू मला म्हणाली,
"आज मी माझी जुनी डायरी विरंगुळा म्हणून वाचत बसले होते. त्यात पुलं ,वपु, बहिणाबाई ,सुरेश भट, शांताबाई आणखी बरेच जण भेटलेत. संवाद सुरू होता त्यांच्यासोबत‌.पण मध्येच वपूंच्या एका ओळीवर गाडी अडली ती पुढे सरकेचना.तिथेच आवर्तनं .
ते वाक्य होते ,'लग्न म्हणजे एक क्षण भाळणे आणि आयुष्यभर सांभाळणे ‌.'खरंच दोन स्वतंत्र स्वभाव, दोन भिन्न व्यक्तीमत्वे, वेगवेगळ्या आवडीनिवडी एकत्र येऊन अग्नीच्या साक्षीने सात फेरे घेऊन आयुष्यभर सोबत चालण्याची शपथ .
बापरे! किती कठीण. सोबत म्हणजे शय्या सोबत आणि वंशवृद्धी एवढा संकुचित अर्थ निश्चितच नाही. ते तर पशुपक्षीही करतात .मानवाला मन, बुद्धी दिली आहे निसर्गतःच . सुखाचे तर सारेच सोबती असतात पण दुःखाच्या काळात कसोटीच्या क्षणी सोबत करणे म्हणजे साहचार्य. वपु वाचता वाचता मीही विवाहाची माझी व्याख्या करून टाकली,' विवाह म्हणजे विश्वासाने (सह) वाटचालीची हमी."