अकस्मात_ अनामिका भाग १

नवरा मुलगा विवाह स्थळी आल्यावर सुरेल सनईच्या सुरात सर्वांचे रीतसर स्वागत झालं. शेखर राजेशच्या जवळपास राहून त्याला काही हवं नको ते पाहत होता, मामाला मदत करत होता. अधूनमधून तो आलेल्या पाहुण्यांवर नजर फिरवत होता. असे पाहत असताना त्याची नजर एका साध्यासुध्या परंतु सुंदर मुलीवर स्थिरावली. तिने अबोली रंगाची सिल्कची साडी नेसली होती जी तिच्या निमगोऱ्या वर्णावर खुलून दिसत होती. केसांच्या नैसर्गिक बटा तिच्या भालप्रदेशावर रुळत होत्या. तिचे हरणासारखे डोळे चहूबाजूला भिरभिरत होते. शेखरला ती पहिल्याच नजरेत आवडली. इतक्यात ती पाठमोरी झाली आणि तिची गुडघ्यापर्यंत केसांची लांबसडक वेणी त्याच्या डोळ्यात भरली. तिला पाहून त्याने मनोमन निश्चय केला की हिच्याशीच लग्न करायचं. परंतु त्या काळी एखादी मुलगी आवडली म्हणून कोणाच्या ओळखीने मुलं लगेच जाऊन मुलींची ओळख करून घेत नसत.