आमच्याकडे असं नाही करत.. भाग २

" काही नाही ग.. नेहमीचंच. लग्नाला दहा वर्षे होऊन सुद्धा सासूबाईंच्या तोंडात असते की आमच्याकडे असं नाही करत, आमच्याकडे तसं नाही करत. अरे आमच्याकडे काय? आपल्याकडे म्हणता येत नाही का? बरं तरी घरी सगळं यांच्या मनाप्रमाणे असतं. तुला सांगते, भाज्या तर माझ्या आईच्या पद्धतीने मी करतच नाही. पण कधीतरी मुलांचा आग्रह म्हण किंवा या करत नसलेली भाजी आपण जरा वेगळ्या पद्धतीने केली की झालीच सुरुवात.. आमच्याकडे असं नाही करत, आमच्याकडे भाजीत हेच टाकतात आणि तेच टाकतात. पण ती भाजी मला आवडायला पाहिजे ना? बरं तुम्ही ती कधी केली नाही, खाल्ली नाही.. मग मला तर करून खाऊ दे.. पण नाही.. ना खाऊंगी ना खाने दूंगी." मीरा बांध फुटल्यासारखी बोलत होती. "घरात काहिही आणलं की सुरूवात.. आमच्याकडे आधी असंच होतं आणि तसंच होतं. आणि हे आमच्याकडे म्हणजे सासरी नाही बरं का.. त्यांच्या माहेरी. आणि आपण आपल्या माहेरासारखं काही केलं ना, की लगेच सुरूवात, माहेर विसरा आता.. सासरी आलात. पण सासरी येऊन तुम्ही आपलंस केलं का? तुम्हाला मी आपली वाटतंच नाही ना? मग का रहायचं तिथे? नवर्‍याला सांगावं तर तो म्हणतो, तुमच्या सासूसूनांमध्ये मी काही पडणार नाही. तुम्ही तुमचं काय ते बघून घ्या. आणि आपल्या तोंडातून एक उणा शब्द गेला रे गेला की लगेच मग याची सुरुवात. कंटाळा आला ग खूप." मीरा कधीची बोलत होती.