अनोळखी दिशा पर्व २ (भाग ३७)

"का नाही जमणार बाबा? अहो समाजात अशी कितीतरी उदाहरणे आहेत, किंबहुना यापेक्षा खूप विरोधाभास असणारी उदाहरणे पाहायला मिळतात आपल्या आजूबाजूला आणि दुसरीकडे आर्थिकदृष्ट्या समृद्ध कुटुंबात लेकीची पाठवणी करून देखील काही वर्षांनंतर तेच बाहेरून सुखी दिसणारे कुटुंब घटस्फोटासाठी कोर्टाच्या वाऱ्या करताना दिसतात. दिसताना सर्व ठिक दिसतं पण म्हणून ते सुखी आणि समाधानी असतातच असे नाही बाबा. म्हणजे लव्ह मॅरेज करणारे सर्वच जण अगदीच सुखात असतात असे नाही म्हणत मी. पण नात्यात विश्वास, प्रेम आणि समजूतदारपणा असेल तर मग परिस्थिती कोणतीही असू देत तिथे सुख आणि समाधान मात्र नक्कीच मोठे असते."