अनोळखी दिशा पर्व २ (भाग ५०)

"बरं तुला ऐकायचंच आहे ना तर आज ऐक...मी आणि हर्षु आणि दोघंही एकमेकांवर खूप प्रेम करतो. गेल्या दोन वर्षापासून आम्ही काँटॅक्टमध्ये आहोत आणि हे तिच्या घरच्यांना देखील माहिती आहे. आज तुझ्या लेकाने जे काही यश मिळवलंय ना हे फक्त तिच्यामुळे आणि फक्त तिच्यासाठी. अजून फक्त एक वर्ष.. माझ्या राहिलेल्या दोन एक्झाम एकदा का क्लिअर झाल्या की मग आम्ही लग्न करणार आहोत आणि आताच तुला सांगतोय जसा दीला तू त्रास दिलास तसा हर्षुला दिला तर तू तुझ्या मुलाला कायमचं गमावशील हे ध्यानात ठेव आणि लोक काय म्हणतील हा विचार आपण नाही तर हर्षुच्या घरच्यांनी करायला हवा होता ना! पण त्यांनी तसे नाही केले. आपली आणि त्यांची बरोबरी नसताना आणि त्यात तुझे सगळे कारनामे त्यांना माहीत असताना ते ह्या घरात मुलगी देण्याचे धाडस तरी करत आहेत. नाहीतर मला नाही वाटत तुझ्या नशिबात ह्या जन्मी तरी सून होती म्हणून. हे सुख फक्त माझ्या बहिणीमुळे मला भेटणार आहे. बाबांची पुण्याई म्हण किंवा दीचे नशीब चांगले म्हणून सोन्यासारखी माणसं तिला मिळाली. नाहीतर आमच्या आयुष्याचे वाटोळे फिक्स होते आणि तेही फक्त तुझ्यामुळे."