अनोळखी दिशा..(भाग २१)

'सुपर्णा आज सगळी सुखं लाथाडून तू तुझ्या मनाचे ऐकलेस. माझ्या प्रेमाचा अनादर केलास. माहीत नाही का तू एव्हढा मोठा निर्णय आणि तोही इतका अविचाराने घेतलास? पण होणाऱ्या गोष्टींना कोणी अडवू शकत नाही, हेही तितकेच खरे. कदाचित यालाच आयुष्य म्हणतात. सुख-दुःख हे ऊन सावलीप्रमाणे मनुष्याचा पाठलाग करतच राहतात.
तू गेल्यानंतर माझ्या आयुष्याच्या उजाड माळरानावर हिरवळ पसरविण्यासाठी म्हणून की काय माहित नाही पण परमेश्वराने अगदी योग्य वेळी नेत्राला माझ्या आयुष्यात पाठवले. हिच नियतीची आणि परमेश्वराची इच्छा होती जणू. मलादेखील हा दैवाचा अनोखा खेळ अजूनही समजला नाही. पण म्हणतात ना...जे होते ते चांगल्यासाठीच, हेही तितकेच खरे. '