अनोळखी दिशा..(भाग २४)

"मागच्या दोन वर्षांपूर्वी माझ्या आयुष्यात एक मुलगी आली होती. तिचे नाव सुपर्णा. कॉलेजमध्ये आम्ही सोबत होतो. आता काहीही झाले तरी मी सुपर्णाशीच लग्न करणार हे मनातून मी ठरवून मोकळा झालो. घरीही लगेच सांगितले. तसेही घरच्यांना, पाहताक्षणी सुपर्णा आवडली होती. हळूहळू आमची प्रेमकहाणी फुलत होती. दरम्यान सुपर्णाचे घरी जाणेयेणे वाढले.
कॉलेज पूर्ण झाले आणि फायनली आम्ही लग्न करण्याचा विचार घरी सांगितला. पण जशी वेळ जवळ येत होती तशी सुपर्णा मात्र मागे हटत होती. कारण काहीच कळेना. शेवटी अचानक एक दिवस सुपर्णाचे दुसऱ्याच कुणाशी तरी लग्न होत असल्याचे समजले. नात्यात इतका मोठा विश्वासघात झाल्यामुळे मनातून मी खूपच खचलो. जगण्याची आशा विरूनच गेली आणि रागाच्या भरात मागचा पुढचा कोणताही विचार न करता भर पावसात रात्रीच्या त्या भयाण शांततेत मन वेगळ्याच वाटेवर धावू लागले. सर्वत्र फक्त अंधार पसरला होता आणि सोबतीला होती अवेळी पडणाऱ्या पावसाची साथ."