अनपेक्षित बांधली गाठ (भाग:-३९)

फादर डोळ्यांवरचा चष्मा काढून भावूक स्वरात म्हणाले,"श्याम, ती मुलगी वेडी आहे, या एकाच कारणामुळे तू तिच्यासोबत जे चुकीचे वागलास. त्या चुकीपासून तू पळून जाऊ शकत नाहीस. अरे यामुळे तिला भविष्यात किती अडचणींना सामोरे जावे लागेल याची कल्पना आहे का तुला? उद्या ती मुलगी पूर्ण बरी झाली आणि तिच्या गळ्यात मंगळसूत्र नाही, बिनलग्नाची ती आई होणार आहे. हे जर तिला कळलं, तर तिच्या मनावर होणाऱ्या परिणामांची कल्पना कर. काय अवस्था होईल तिची? एकतर ती पुन्हा वेडी होईल किंवा आत्महत्याच करेल. बलात्कार झालेल्या मुलीला समाज कोणत्या नजरेने पाहतो हे मी तुला वेगळं काही सांगायची गरज नाही. तिला तो बलात्कारी कोण हे माहिती नसतं, रोज रक्ताचे अश्रू गाळत असते आणि आपला समाज तिला रोज टोमणे आणि उपदेशांचे डोस पाजून, दोष देऊन मारत असतो. अशी अवस्था तिची व्हावी असे तुला वाटते का? "