अनपेक्षित बांधली गाठ (भाग:-४४)

सूर्य मावळतीकडे झुकला होता. आकाशात केशरी-गुलाबी छटा पसरल्या होत्या. दिवसभराच्या धावपळीने थकलेली झाडंही जणू निवांत श्वास घेत होती. थंडगार वाऱ्याची हलकी झुळूक अंगावर येत होती. पक्षीही किलबिल करत आपल्या घरट्याकडे परतत होती. हाॅस्पिटल आवारात हळूहळू दिवे लागायला सुरुवात झाली होती आणि चर्चच्या घंटानादाने परिसरात एक पवित्र शांतता पसरली होती. संध्याकाळची प्रार्थना करून फादर माघारी फिरत होते.