अपराध माझा असा काय झाला? अंतिम भाग

" यात सहानुभूतीचा प्रश्नच येत नाही. त्या दिवशी तुला घरी सोडले तेव्हा तू अगदी घाबरलेली होतीस, धक्क्यात होतीस. तुझी खूप काळजी वाटत होती. पण एका महत्त्वाच्या कामासाठी मला दुसऱ्याच दिवशी बाहेर जावे लागले होते. तिथेच मी टिव्हीवर ती बातमी बघितली. ती बघून मला ओळखणाऱ्यांचे मला कौतुकाचे फोन आले. तेव्हाच मनात विचार आला की जसा मला या घटनेचा परिणाम भोगावा लागला तसा तुलाही लागला असेलच ना? तेव्हाच इथे यावेसे वाटले होते. पण नाईलाज होता. काल रात्रीच मी मुंबईत परत आलो. आता लगेच इथे आलो. तुझा मगाशी दुर्गेचा अवतार बघितला आणि क्षणभर वाटले की हिच ती जिला आपण शोधत होतो. माझी जबरदस्ती नाही. तू विचार कर आणि वाटलं तरच मला उत्तर दे. निर्णय सर्वस्वी तुझाच असेल. निघतो मी." स्वतःचं कार्ड तिथे ठेवून अनिरुद्ध तिथून निघून गेला. प्रवीणराव, स्वातीताई आणि श्रिया तो गेला त्या दिशेने बघतच राहिले.