अपराधी कोण? भाग ७

" म्हणजे?? मेघना तुमची कॉलेजची मैत्रिण. तिचे तुमच्याच शेजारी राहणाऱ्या अनमोलशी लग्न झाले. आधी सगळे सुरळीत सुरू होते. पण मेघनाच्या दुसर्‍या बाळंतपणाच्या दरम्यान तुमची भेट झाली. मग तुम्हा दोघांना वाटले की आपला लग्नाचा निर्णय चुकला म्हणून. तुमच्या भेटीगाठी सुरू झाल्या. मेघनाला याचा संशय आल्यावर ती अनमोलशी भांडायची, रडायची.. पण.. मग सुरू झाला तुमचा प्लॅन.. मेघनाची चिडचिड व्हायची तर तुम्ही तिची समजूत करून दिली की तिला मानसिक आजार झाला आहे. त्यामुळेच ती विनाकारण भांडते आहे. अशा अवस्थेत मुलांना दूर ठेवणेच योग्य.. तिचा विश्वास बसला कारण नुकतेच तिच्या आईवडिलांचे अपघाती निधन झाले होते. आणि बहिणीशी भांडण झाले होते. बरोबर ना अर्चनाताई? काळजावर दगड ठेवून तिने मुलांना दूर केले. आपल्या मैत्रिणीचा नवरा गेला आहे, तिला कोणीच नाही, तिला आधार मिळावा म्हणून मेघनाने तुम्हाला घरी आणले.. पण तुम्ही तिचाच आधार काढून घेतला." अश्विनी रडायला लागली.. अनमोल फक्त बघत उभा राहिला.