अपराधी कोण? अंतिम भाग

" मी बरोबर आहे म्हणजे? विक्रम उर्फ आदित्य उर्फ निलेश आणि अजून कोण कोण.." प्रशांतने बोलणे चालू ठेवले. " तर हा विक्रम नुकताच इथे रहायला आला होता. मेघनाला भेटायला येणारी माणसे बघून त्याची तिच्याबद्दलची उत्सुकता वाढली. पहिल्यांदाच त्याने स्वतःहून तिच्याशी ओळख वाढवली. मेघना लेखिका आहे हे त्याला समजले. तो भेटायला आला तेव्हा तिने त्याला स्वतःचे एक पुस्तक भेट म्हणून दिले. पण तिला तो आवडला नाही हे त्याला समजले होते. विक्रम ज्या कामासाठी म्हणजे खुनासाठी इथे आला होता तो त्याने पार पाडला. शहर सोडायच्या आधी सहज म्हणून तो मेघनाला भेटायला आला. ती लिहित होती म्हणून तो तिच्या स्टडीरूममध्ये गेला. त्याला तिथे बघून ती चिडली. ती काही बोलणार तोच तिला अर्चनाचा फोन आला. फोनवर बोलायला म्हणून ती बाहेर गेली तेवढ्यात त्याची नजर ती लिहित असलेल्या कागदावर पडली. कुतूहल म्हणून त्याने ते वाचायला सुरुवात केली. जसे जसे तो ते वाचू लागला तस तसा तो घाबरला.. कारण मेघनाने एक मर्डरमिस्टरी लिहिली होती. त्यात जो खून दाखवला होता अगदी तसाच खून नुकताच विक्रमने केला होता. चोराच्या मनात चांदणे, त्यामुळे आपण केलेला खून मेघनाला समजला असावा आणि तिने तो उतरवून काढला. ही गोष्ट पोलिसांपर्यंत जायच्या आधीच त्याला तिला संपवायचे होते.."