अशी जुळली गाठ. भाग - १६

"हो आणि तिथे गेल्यावर तिने हट्टाने तिथेच हाॅस्पीटलमध्ये मला तिच्या गळ्यात मंगळसूत्र घालायला सांगितले. तिने सलाईन काढून फेकले होते. त्यामुळे तिचे बाबा सुद्धा काही करू शकले नाही आणि मला तर त्यावेळी तिचा जीव सोडून दुसरं काहीच महत्वाचं वाटत नव्हते मग मी ही कसलाही विचार न करता तिच्या गळ्यात मंगळसूत्र घातलं. तिथे हाॅस्पिटलमध्येच एक प्रकारे आमचं लग्न झालं." ऋग्वेदने त्याची सगळी कहाणी सांगितली. पण त्यात चुक कोणाची होती आणि दोष कोणाला द्यावा हेच कळत नव्हते. त्याची कहाणी ऐकून ते दोघेही सुन्न झाले होते. क्षणभर त्या तिघांमध्ये शांतता होती. पण नंतर सान्वीने बोलायला सुरुवात केली.