अशी जुळली गाठ. भाग - ४२

"इशिता, शेवटचं विचारतोय तुला... खरं काय आहे ते सांग मला, आजपर्यंत मी सगळ्यात जास्त विश्वास कोणावर ठेवला असेल तर तो फक्त तुझ्यावर आहे. त्या साईटचं सगळं काही तूच बघत होती. यात जर तुझा हात असेल तर मी तुला कधीच माफ करणार नाही. तुला एक शेवटची संधी देतोय, माझ्याशी प्लीज खोटं बोलू नकोस. जेव्हापासून मी तुझ्या कानातल्याचा फोटो पाहिला आहे, तेव्हापासून मला किती त्रास होतोय याची तुला कल्पना सुद्धा नाहीये. रात्री जेवलो तर नाहीच पण रात्रभर माझ्या डोळ्याला डोळा लागला नाही या विचाराने, खुप विश्वासाने मी तुझ्यावर ही जबाबदारी सोपवली होती आणि तू तर माझाच विश्वासघात केला." बोलताना कबीरला रागही येत होता आणि वाईटही वाटत होते. तो पाणी प्यायला आणि परत बोलू लागला.