अशी जुळली गाठ. भाग - ५२

दुपारच्या वेळी सान्वी एकटीच घरी होती. सविता कामानिमित्त बाहेर गेली होती आणि श्रावणी काॅलेजला गेली होती. लता मावशी होत्या, पण त्या त्यांच्या कामात होत्या. सान्वीला खुपच अस्वस्थ वाटत होतं आणि चक्करही येत होते. उलटी झाल्यासारखं वाटत होतं पण उलटी होत नव्हती, नुसती मळमळ होत होती. म्हणून ती किचनमध्ये आली आणि लिंबू सरबत करू लागली. त्याचवेळी तिला घेरी आली आणि चक्कर येऊन खाली पडली. तिच्या हातात असलेला ग्लास खाली पडल्यामुळे त्याचा आवाज झाला. त्या आवाजानेच लता मावशी धावतच आल्या. सान्वीला पडलेलं बघून त्या खुप घाबरल्या. त्या तिला खुप उठवायचा प्रयत्न करत होत्या पण सान्वी उठतच नव्हती. शेवटी त्यांनी घाबरून कबीरला फोन केला आणि तिच्या बद्दल सांगितलं.