आठवणीतली सुगंधी कुपी

छोट्या छोट्या कितीतरी जुन्या वस्तू आणि जिर्ण कपडे आठवणींसाठी म्हणून तिने जपून ठेवले होते. शाळेत असताना तिचा निबंध स्पर्धेत पहिला क्रमांक आला होता तेव्हा तिच्या बाबांनी तिला एक अत्यंत महागाचं पेन बक्षीस दिलं होतं. बाबा जाऊन सुद्धा आता दहा वर्ष झाली होती आणि ते पेनसुद्धा नीट चालत नव्हतं तरीसुद्धा तिने ते जपून ठेवलं होतं. तिने एक मोरपिशी रंगाची साडी काढली त्यावर हळुवार हात फिरवला. ती तिच्या आईने तिला लग्नानंतर दिलेली पहिलीच साडी होती. आता ती काही ठिकाणी विरली होती तरी तिचा स्पर्श तिला खूप सुखावून जात होता. ती आणि उमेश पहिल्यांदा भेटले तेव्हा उमेशने तिला आगळावेगळा बकुळीचा गजरा दिला होता. गजरा सुकला होता पण त्यातल्या प्रेमाच्या आठवणी आणि सुवास अजूनही ताजा होता. बहिणीने दिलेली पर्स, सासूबाईंनी दिलेला सिल्कचा बटवा अशा तिने बऱ्याच गोष्टी जपून ठेवल्या होत्या. एकेक काढून तिने त्या वस्तू न्याहाळल्या आणि पुन्हा नव्याने सर्व आठवणी ती जगली.