अवंतिका (भाग:-३ अंतिम)

"कसं असतं ना रे, समीर? दुसऱ्यावर चिखल फेकताना किती आसुरी आनंद मिळतो. पण हाच चिखल स्वतःवर उडाले की घाण वाटते ना. वाईट वाटते. काहीही नसताना तू माझ्यावर चिखलफेक केलीस. मला बदनाम केलेस. काय मिळाले रे तुला असं करून. मी तुला मित्र समजून बोलले, आलिंगन दिले. त्यात गैर काय आहे? आणि राहिले मी माॅडल असण्याचा प्रश्न? मी छोटे कपडे घालते ते फक्त माॅडेलिंग, फोटोशूट करण्यापुरतं. तो माझ्या प्रोफेशनचा एक भाग म्हणून घालते. मला माझी मर्यादा, संस्कार माहिती आहेत. ते मी कधी तोडले नाही. बघणाऱ्यांचा दृष्टीकोन बाद असेल तर त्याला कोणी काही करू शकत नाही. अनीवेज सत्य तुमच्या सर्वांसमोर आलं आहे आता. तर तुम्हाला सर्वांना कळलंच असेल त्या दिवशी काय झालं होतं ते. खरं खोटं जाणून न घेता कोणा एका व्यक्तीच्या बोलण्याने एखाद्या मुलीच्या अब्रूच्या बातम्या पसरवून तिला आणि तिच्या परिवारला किती मानसिक त्रास होतो हे माझ्यापेक्षा जास्त कोणाला कळेल? प्लीज अशा बातम्या कोणा मुलीबाबतीत पसरवू नका. प्रत्येक मुलगी अवंतिका नसते. आज मी इथे उभी आहे ते माझ्या पप्पांच्या आणि बहिणीच्या माझ्यावरील विश्वासाने." अवंतिका प्रताप व निलिमा यांच्या खांद्यावर हात ठेवत म्हणाली.