अवि.. एक प्रेम कथा (भाग ९)

"मी मस्त. हाय विद्या कशी आहेस?" तिने म्हणजे पायलने विचारले. पायल म्हणजे विद्या आणि अजयची ज्युनियर. ती सुद्धा त्याच शाळेत होती ज्यात विद्या आणि अजय शिकले, आता कॉलेज देखील एकच होते. त्यामुळे ती दोघांना भेटत असे. पण मागच्या काही दिवसात तिचे अजयला भेटणे वाढले होते. विद्या आणि अजय सोबत असले की, पायल त्यांच्याशी जास्तं बोलत नसे. पण अजय एकटा असला की, मात्र ती त्याच्याशी गप्पा मारत असे. सुरुवातीला विद्याला काही वाटले नाही. पण हळूहळू पायल आणि अजय जास्तं वेळ सोबत घालवू लागले.