#बंध रेशमी नात्याचे. भाग -४०

पाहता पाहता दिवाळी संपत आली होती. आज रियाला हॉस्पिटल मधून डिस्चार्ज मिळणार होता. रियाच्या बेबींचे वेलकम करण्यासाठीची तयारी अगदी बेबींच्या जन्मापासूनच सुरू झाली होती. आजी , आजोबा ,घरातील नोकर मंडळी यांचा उत्साह अगदी शिगेला पोहोचला होता. हॉस्पिटलमधील फॉर्मॅलिटी पूर्ण केल्यानंतर रिया घरी जाण्यासाठी बेडवरून खाली उतरत होती. बाळासाठी असलेल्या केअर टेकर रियाच्या बाळांना घेऊन शेजारीच उभ्या होत्या. आई रियाजवळ थांबली होती. रियाला थोडासा विकनेस जाणवत होता. कितीही लोक आजूबाजूला असले तरी बाळाला आईच्या मायेची ऊब समजत असते. रियाचे आता चांगलेच जागरण सुरू झाले होते. झोप पूर्ण न झाल्याने रियाला अनफ्रेश वाटत होते पण बाळाकडे पाहिले की सगळा थकवा छू मंतर होत होता.त्याच्या इवल्याशा हालचालीही किती आनंद देत होत्या. त्याचे झोपेत डोळे बंद करूनच मधेच हसणे ,मधेच रडणे पाहिले की मोठ्यांच्या चेहऱ्यावरही आपोआप हसू येत होते.