#बंध रेशमी नात्याचे.. भाग -५४

“हे सगळे स्वीकारले असले तरी यातून बाहेर पडायचा रस्ता दूर दूरवरही कुठे मला दिसत नाहीये. या हृदयात खूप काही साठले आहे. खूप गुंता झाला आहे. तो सोडवता सोडवता माझा जीव गुदमरून जातोय. ते म्हणतात ना , सुख हे फुलपाखरासारखे असते. अलगत येऊन आपल्या मुठीत विसावते पण बळजबरी केली की ते मरून जाते. माझ्या रियाने अर्णवला मिळविण्यासाठी जीवाचा आटापिटा केला. अर्णवला मिळवण्यात ती तिचे सुख शोधत होती. तिने बळजबरीने सुख मिळवले पण तिच्या नशिबी सुख नव्हतेच. त्या फुलपाखरासारखे माझ्या रियाचे सुखही गुदमरून गेले ग. लग्नासाठी कितीतरी श्रीमंत मुले तिच्या मागे असताना तिने सगळ्यांना नकार दिला. लहानपणापासून तिचा प्रत्येक हट्ट पुरवणारा मी ही अगदी आंधळा झालो होतो. चांगले काय ? वाईट काय ? हे कळूनही रियाला साथ देत गेलो. कारणही तसेच होते ओवी , रियाने मला जग सोडून जाण्याची धमकी दिली होती आणि म्हणूनच मी तिचे अर्णवसोबत लग्न लावून द्यायचा अट्टाहास केला पण काय माहित होते माझ्या रियाच्या आयुष्यात अर्णवचा विरहच होता आणि आता तिच्या चिमुकल्यांच्याही आयुष्यात आई बाबांचा विरहच लिहीला आहे.”