#बंध रेशमी नात्याचे. भाग -५३

“नाही ओवी अर्णवला यातले काहीच माहित नाही. अर्णवला हे समजले तर तुम्ही दोघे वेगळे व्हाल जे रियाला नको होते म्हणून तिने तुलाही आणि अर्णवलाही तेंव्हा ही गोष्ट सांगितली नाही. रियाला एक मुलगा आणि एक मुलगी झाली होती. जेंव्हा रियाला राकेशकडून तू कधीही आई होणार नाहीस हे समजले तेव्हा ती स्वतःच्या बाळाला तुला देणार होती. इथे आल्यावर तुम्हा दोघांना ती दिसली तर पुन्हा तुमच्या आयुष्यात वादळ निर्माण होईल म्हणून तिने स्वतः भारतात यायचे ही टाळले. मी आणि रियाची आई बाळाला घेऊन भारतात आलो. ख्रिसमसच्या दिवशी अनाथ आश्रमातून तुम्ही बाळाला दत्तक घेणार आहात म्हणून बाळाला अनाथ आश्रमात आदल्या दिवशी ठेवून आलो.
पण त्याच दिवशी राकेशकडून आम्हांला समजले की , तू अर्णवला आणि त्याच्या घराला सोडून कायमची निघून गेली आहेस. हाच धक्का रियालाही बसला. सगळ्या परिस्थितीचा दोष रिया स्वतःला देत होती. आणि या ट्रेसमध्येच जिन्याच्या पायरीवरून रियाचा पाय घसरला आणि रक्तबंबाळ झालेली माझी रिया काही तासातच हे जग सोडून निघून गेली.
अवघ्या नऊ महिन्याच्या माझ्या आर्याला आईचे प्रेम मिळालेच नाही.” रियाचे बाबा.