भेटली तू पुन्हा ! भाग - सत्तेचाळीस

विश्वराजने कमी वयात असतांनाच बिझनेस हाती घेऊन अंजली इंडस्ट्रियलला नंबर वन वर आणली होती. त्यासाठी त्याने रात्रंदिवस मेहनत घेतली होती आणि या मेहनतीत साथ दिली होती त्याच्या जीवाभावाच्या मित्राने सत्यन. जो त्याच्या प्रत्येक सुख दुःखाचा साथी होता.. अंजली यांना गंभीर आजार झाला हे त्यांनी विश्वराजपासून लपवून ठेवले होते... त्या थोड्याच दिवसांच्या सोबती होत्या आणि हे त्यांनाही माहिती होते. पुढचे जितकें आयुष्य मिळेल ते त्यांनी मनमुराद जगायचे ठरवले होते.
विश्वराजसमोर त्यांनी लग्नाची अट ठेवली होती, कारण त्यांना विश्वराजची काळजी होती. आपल्यानंतर विश्वराज एकटा राहू नये, त्याच्यावर भरपूर प्रेम करणारी,त्याला सांभाळणारी अशी एखादी व्यक्ती त्याच्या आयुष्यात असावी, असे त्यांना मनोमन वाटत होते. सत्यन,आईशिवाय या जगात त्याचे कुणीही नव्हते. विश्वराजचे लग्न होऊन त्याला सुखी संसारात पाहून त्या डोळे मिटायला मोकळ्या होणार होत्या. त्यांच्यासमोर खूप संकटे आले पण त्यांनी कधी हार मानली नव्हती. विश्वराजच्या बाबांनी त्यांचा विश्वासघात केला आणि ते वेगळे झाले. विश्वराजने लहानपणापासूनच आईचा संघर्ष, होणारा त्रास आणि एकट्यात रडतांना पाहिले होते, म्हणून तो कोणालाच लग्नाची कमिटमेंट द्यायला तयार होत नव्हता. त्याच्यामागे मुलींची रांग होती,पण त्याने कोणालाच भाव दिला नाही. त्याची क्लासमेट रिया त्याच्यावर फुल्ल फिदा होती. तिने त्याला प्रपोज केले, पण त्याने स्पष्ट नकार दिला होता.तो तिला फक्त मैत्रीण म्हणूनच पाहत होता. त्याने तिच्यासोबत बोलणेही कमी केले होते.