बोललं तर काय झालं??

"आई, मी निघते. कुकर तयार ठेवला आहे. फक्त गॅस चालू करायचा आहे." जाताना तिने नेहमीप्रमाणे सांगितले आणि ती बाहेर पडली. आज तिला नशिबाने पटकन बस मिळाली. बसमध्ये बसल्यावर तिचे विचारांचे चक्र सुरू झाले. लग्नाला पंधरा वर्षे झाली होती तिच्या. पण अजूनही तिच्या सासूबाईंशी तिचे जमले नव्हते. सासरे, नणंद सासरच्या बाकी सगळ्या नातेवाईकांशी तिचे छान पटायचे. पण सासूबाईंशी? नावच नको. तिच्या लग्नात मानपानावरून उडालेली ठिणगी अजूनही शमली नव्हती. वरवर दोघीही जरी एकमेकींशी जेवढ्यास तेवढे बोलत असल्या तरी कधीतरी वाजायचेच. ते वाजले की तिचे आणि नरेनचे भांडण ठरलेलेच. त्याचा कंटाळा येऊन तिने सासूबाईंना प्रत्युत्तर करणे बंद केले होते. त्यामुळे दोन्ही आघाडय़ांवर म्हटलं तर शांती असायची. पण कधी कधी टोमण्यांचा भडिमार असायचाच. तेच तिला नरेनला सांगायचे होते. पण त्याला कधी वेळच नसायचा. त्यातूनही या गोष्टींसाठी तर नाहीच नाही. मनात तरी किती ठेवणार?

0