चंद्राची रोहिणी अन् पुनवेचा चांद (भाग ४)

पुनमने शाळा सुरू करण्याची जबाबदारी घेतली. नवीन शिक्षक, शिक्षिका भरती करण्यात आले. योग्य शिक्षण पद्धती सोबत प्रत्येक वर्षी सहल, कार्यक्रम आणि खेळ राबविण्यात येत होते. सरकारी सुविधा विद्यार्थांना देण्यात येऊ लागल्यामुळे सबंध गावातील लोक आपल्या मुलांना शाळेत पाठवायला लागले. गावातील स्त्री व पुरुषांसाठी साक्षरता मोहीम राबविण्यात आली. स्त्रिया शाळा सुटल्यानंतर शाळेत येऊन बसायच्या. तर कष्टकरी वर्ग संध्याकाळी काम करून आल्यावर शाळेत येऊन बसायचे. जनकल्याण मोहीम राबविण्याचे नवे प्रकल्प तिने हाती घेतले होते. जेणेकरून महिलांनासुद्धा गावातच रोजगार प्राप्त होईल. गावाचे चित्र पूर्णपणे बदलून गेले होते. लहान मोठे वयस्कर मंडळी बाप - लेकीस येता जाता आशीर्वाद देत होते. अखेर गावाचे नाव साक्षरतेच्या यादीत आले. पुनमचा तालुक्यातून सत्कार करण्यात आला. एकंदर आबांचे स्वप्न तिने पुर्ण करून दाखवले.