चंद्रिका भाग : १

पौर्णिमेचा चंद्र आकाशात पूर्ण आलेला. एक मुलगी रस्त्याच्या कडेला बेशुद्ध अवस्थेत पडलेली. डोक्याला थोडासा मार लागलेला. अनुराग तेथूनच आपली बाईक घेऊन सुसाट जात होता. जाता जाता त्याची नजर रस्त्याच्या कडेला पडलेल्या मुलीवर गेली. गाडी सुसाट होती म्हणून त्याला बाईक थांबवता आली नाही म्हणून अनुराग पुढे जाऊन पुन्हा मागे आला. तो त्या मुलीला आधी दुरूनच एकटक पाहत होता. त्या अवस्थेत पडलेल्या मुलीला पाहून त्यात रस्ता सुनसान. मदतीची गरज असावी कदाचित म्हणून हिंम्मत करून तिच्याजवळ गेला. हात लावून पाहिले तर कळले त्या मुलीला शुद्ध नव्हती अनुराग त्या मुलीला शुद्धीवर आणण्याचा प्रयत्न करू लागला. जवळ असलेल्या पाण्याच्या बाटलीतून थोडे पाणी तिच्या तोंडावर शिंपडले. मुलगी घाबलेल्या अवस्थेत अंगाला हिसके देत शुद्धीवर आली. तिने डोळे उघडले तेव्हा समोर अनुराग दिसला. तिने त्याला पाहून घाबरत घट्ट मुठी धरली. काहीतरी शोधत असावे या नजरेने ती आपल्या अवतीभवती भरभर नजर फिरवली.