चंद्रवासी - भाग 2

दोघांचीही अवस्था आता बिकट होत चालली होती. हळूहळू दोघांचीही शुद्ध हरपली. जाग आली तेव्हा दोघे एका काचेच्या गोलाकार खोलीत होते. खोलीत निळसर प्रकाश पसरला होता. त्या दोघांवर निश्चितपणे काही उपचार केले गेले होते. ती खोली काहीशी उबदार दिसत होती. त्यांचा सूट काढून त्यांना काहीतरी वेगळंच घातलेलं होतं. हे असं कापड त्यांनी त्यांच्या आयुष्यात कधीही बघितलं नव्हतं. ते नक्की कुठे आहेत काहीच कळत नव्हतं. खोलीत काही चिन्हं बनवलेली होती; पण ती त्यांना वाचता येत नव्हती. सुदैवाने ते दोघेही एकाच खोलीत होते. त्यांना दोन स्वतंत्र पलंगांवर झोपवलेलं होतं. त्यांच्या अंगात विविध नळ्या जोडलेल्या होत्या. त्यांना ऑक्सिजन मास्क लावावा लागत नव्हता. ते आजूबाजूचं निरीक्षण करत होते तेव्हाच काहीतरी आवाज आला. कोणीतरी निश्चितच तिथे येत होतं.