चूक कुणाची? भाग १

"आई खोटं बोलतायत. त्यांनी माझा हात खरंच पिरगाळलाय. मी फोटो पाठवते तुम्हाला." असे तणतणत रश्मीने फोन कट केला. तिला आईला समजवण्याचीही संधी दिली नाही.
दोन मिनिटांनी विद्याला वाॅटसअपवर मेसेज आला. विद्याने पाहिले तर रश्मीचा मेसेज होता. तिने ओपन करून पाहिला तर रश्मीचा हात थोडा लालसर दिसत होता. ते खोटे आहे असे विद्या म्हणू शकत नव्हती, पण आई असे काही करेल असेही तिला वाटत नव्हते. त्यावेळी तिथे नेमके काय झाले असेल या विचारात ती पडली.