आयत्या बिळात सासुबा (ई)...

गेले कित्येक दिवस कीर्ती सुशांतच्या मागे लागली होती, झोपाळ्यासाठी. तिला बागेत झोपाळा बसवून घ्यायचा होता. तिला वाचनाचा छंद होता आणि कॉफी पीत पीत बागेत झोपाळ्यावर बसुन वाचायची इच्छा होती तिला. बर्‍याच दिवसानंतर तिचे बोलणे मनावर घेऊन सुशांतने दोन दिवसापूर्वी झोपाळा बसवला होता. पण त्यावर बसण्याचा योग अजुन कीर्तीचा आला नव्हता.
सुनंदाताई झोपाळा सोडतच नसत. आणि वर येणार्‍या जाणार्‍या लोकांना,' माझ्या लेकाने माझ्यासाठी झोपाळा बसवून घेतला आहे असे सांगत.' कीर्तीने झोपाळ्याचा विषयच मनातून काढून टाकला.

सुनंदाताईंचा स्वभावच असा झाला होता सुशांतचे लग्न झाल्यापासून. त्या दोघांनी स्वतःसाठी काही केले, तर या न विचारता आयत्या जाऊन त्या गोष्टीचा उपभोग घ्यायच्या. नवीन घर घेतले असताना कीर्ती व सुशांतची मास्टर बेडरूम त्यांनी न विचारता बळकावली होती. आणि वर सर्वांना सांगत,' माझ्या मुलाने माझ्यासाठी मी नको नको म्हणत असताना इतकी मोठी बेडरूम दिली.'
असे नव्हते की त्यांना कळत नसायचे की ही गोष्ट सुशांतने आपल्या बायकोसाठी केलीय. पण मुद्दाम तीच गोष्ट त्या बळकवायला बघत.