रंग प्रेमाचा! - ०८

         दुसऱ्या दिवशी सकाळी चार्ल्सने दिलेला ब्रेकफास्ट करून ते चौघेही निघाले होते. त्याची कार फारच आलिशान होती. अदा आणि आरवला चार्ल्सने तयार केलं होतं. त्यांना असं जॅकेट्स, बिनीमध्ये वगैरे पाहून निशाला ते फार गोड वाटत होते. तिची अवस्था फार वेगळी होती. तिने आणलेले स्वेटर इथे काही उपयोगाचे नसल्यामुळे त्याने आपलेच काही जॅकेट्स तिला दिले होते. त्याचे जॅकेट्स घातल्यामुळे ती आहे त्यापेक्षा छोटी दिसत होती. मगाशी आरशात बघून स्वतःलाच बुजगावणं अशी टिप्पणीही तिने देऊन झाली होती. त्याला मात्र ते तिघेही गोड वाटत होते. हॅप्पी फॅमिलीचं त्याचं अधुरं स्वप्न पूर्ण होण्याची आशा नव्याने दिसत होती त्याच्या नजरेत. ते पार्किंगमध्ये आले.