द बॉस - The Boss (पर्व 2- भाग 28)

इनायाला आता शब्दांतरमध्ये महत्वाचे निर्णय घेणं भाग होतं. मासिकात बऱ्याच काळापासून काहीही बदल झाले नव्हते, काहीतरी नावीन्यपूर्ण करण्याची गरज वाटत होती. इनायाने तांत्रिक बाजू सांभाळली होती, त्यामुळे या नवीन कल्पना, उपक्रम राबवणं तिला कठीण जात होतं. पण बदल करणं आवश्यक होतं, लोकांना काहीतरी नवीन देऊन लोकप्रियता टिकवून ठेवणं महत्वाचं होतं. इनायाला काहीही सुचत नव्हतं. ती शब्दांतरचे जुने मासिकं चाळत बसली. त्यातून काही मिळतंय का हे बघू लागली. ज्या ठिकाणी शब्दांतरच्या जुन्या मासिकांचा संग्रह होता तो चाळत असतांना तिथून अचानक एक फाईल खाली पडली. इनायाने कुतूहलाने ती उघडली. त्यातलं एकेक पान ती वाचू लागली, वाचता वाचता मटकन खुर्चीवर बसली..मन सुन्न झालं.. विचारशक्ती मंदावली.. काय होतं त्या फाईल मध्ये?