अग्ग बाई सुन बाई भाग दोन

सासू -"आम्हाला हुंडा वगैरे काही नको. आम्ही अगदी सुशिक्षित लोक आहोत. असल्या जुना प्रथांना आम्ही अजिबात मानत नाही. पण असं बघा आमच्या घरचं हे पहिलंच मंगल कार्य आहे, त्यामुळे आमचा माधव- नवरा मुलगा घोड्यावर तर बसणारच ना! घोडा, बँड, कार्यालय, जेवणावळी, मुलाचे कपडे, शिवाय लग्नात नवर्या मुलाला गोफ, अंगठी एवढे तर तुम्ही नक्कीच देणार! माधव सरकारी कंत्राटदार आहे, त्यामुळे अनेक मोठे अधिकारी आणि इतर स्थानिक मान्यवर मंडळी लग्नाला येणार, त्यानुसारच तुम्ही लग्न करून देणार ना!! बाकी आम्हाला जास्त काही अपेक्षित नाही. पण आता नव्या जोडप्याला झोपायला दिवाण, रमाला ड्रेसिंग टेबल, कपाट आणि रमा इतकी शिकलेली आहे तर घरी थोडीच बसणार? म्हणून मग शाळेत येणं जाणं करण्यासाठी दोन चाकी गाडी तुम्ही देणारच ना यापेक्षा जास्त काही आम्हाला नको. चला तर मग हे लग्न ठरलं असं समजूया!!