देवी रक्षति रक्षितः.. भाग ३१

"ए बाबा, चिडू नकोस असा. सांगतो. तारकासूर नावाचा एक राक्षस होता. सगळ्या राक्षसासारखे त्याच्या आयुष्याचे सुद्धा एकच लक्ष्य होते.. ते म्हणजे अमर होणे. त्यातून त्याने शंकरांकडूनच वर मिळवला होता की त्याचा वध फक्त शंकरांचा मुलगाच करेल. आता शंकर तेव्हा अविवाहित होते. संन्यस्त म्हणून प्रसिद्ध होते. ते लग्न करतील असं त्याला वाटलंच नाही. पण सती आली आणि तिने शंकरांशी लग्न केले. आता यांना पुत्र होईल या विचाराने तो धास्तावला होता. पण सतीनेच तिचा हा जन्म संपवला. तरीही त्याचा कोणावर विश्वास नव्हता. सतीची शक्तीपीठे एकत्र येऊन परत काही होऊ नये यासाठी तो प्रयत्नशील होता. तेव्हा शंकरांनी पृथ्वीला ती शक्तीपीठे आपल्या उदरात गुप्त स्वरूपात ठेवायला सांगितली. तिने तशी ठेवताच त्यांनी त्या प्रत्येक पीठाच्या रक्षणासाठी भैरवाची निर्मिती केली. बस्स.." कपिलने वाक्य पूर्ण केले.