देवता _ असंही एक नातं (भाग २)

नीलिमा आणि मिलिंदची प्रेमकहाणी पूर्ण कॉलेजमध्ये चर्चेचा विषय झाला होता.  दोघांनाही सारी मित्रमंडळी लव्हबर्ड्स म्हणायचे.  खरंतर कॉलेजच्या पहिल्या वर्षाला त्या दोघांमध्ये फक्त मैत्रीचे नातं होतं.  त्यांचा दहा जणांचा ग्रुप म्हणजे अगदी सळसळता उत्साह होता.  सहा मुली आणि चार मुलं असा त्यांचा ग्रुप सगळ्या ऍक्टिव्हिटी मध्ये नेहमीच भाग घेत होता.  कॉलेजच्या दुसऱ्या वर्षाला असताना नीलिमा आणि मिलिंदने गॅदरिंग मध्ये एका एकांकिकेमध्ये नल आणि दमयंतीची भूमिका केली होती.  बस तेव्हापासून सर्वांनी त्यांना नल आणि दमयंती चिडवायला सुरुवात केली.  ह्या अशा चिडवाचिडवीतून दोघांमध्ये हळुवार प्रेमभावना कधी निर्माण झाली त्यांचे त्यांनाही कळलं नाही.  दोघांनाही प्रेमाचा आविष्कार झाला आणि मग काय विचारायलाच नको.  सर्वांच्या नजरा चुकवून दोघंच भेटू लागले.  या चोरट्या भेटिंबद्दल कोणालाही काही पत्ता लागू नये म्हणून दोघेही कॉलेजच्या बाहेरच भेटू लागले.