धाकटी सून (भाग ११)

बघता बघता सायलीचं पहिलं सेमिस्टर संपत आलं होतं. दिवाळीनंतर पहिल्या सेमिस्टरच्या परिक्षा होत्या. ललिताबाईंना ही गोष्ट कळली तेव्हा त्यांना तर आयताच मोका मिळाला होता. त्यांनी गावाकडे पाठवायचा म्हणून खूप सारा फराळ दोन्ही सुनांकडून करून घेतला… त्यात दरवर्षीप्रमाणे घराची साफ सफाई तर होतीच आणि भरीसभर म्हणून की काय आपल्या मोठ्या मुलीच्या, सुषमाच्या सासरकडच्या लोकांना चांगलं आठ दिवस दिवाळीसाठी बोलावून घेतलं. सायलीची ही पहिली दिवाळी होती, या दिवाळसणात माहेरी जायला मिळेल म्हणून सायली खूप खुश होती; पण ललिताबाईंनी तिच्या स्वप्नांवर पाणी फेरलं होतं. सायलीचं मन अगदी खट्टू झालं होतं.