घटस्फोट एक पुनर्विचार २

तीन वर्षांपूर्वी दोघांचं लव मॅरेज झालं होतं. लग्नाच्या आधी दोघेजण वर्षभर एकमेकांच्या प्रेमात होते. नंतर घरात कळल्यावर थोडाफार वाद झाला पण कसेबसे दोघांच्या घरचे तयार झाले. लग्न झाल्यावर दोन महिन्यानंतर सायलीने नोकरीसाठी अप्लाय दिला आणि तिला जॉब लागला. घरातही काहीच प्रॉब्लेम नव्हता. त्यांची मोठी सूनसुद्धा जॉब करत होती. मुलीचेही स्वतःचे ब्युटी पार्लर होते. माणूस म्हणून घरातल्यांचे विचार सुशिक्षित होते. त्यामुळे करिअर बाबतीत सायलीला कुठलेच अडचण आली नव्हती. दोघांचे रुटीन चांगलं बसलं होतं. सकाळी दोघे एकत्र जात होते. फक्त येताना कधी कधीच दोघांना एकत्र येण्याची संधी मिळत होती. सायलीचे ऑफिस लवकर सुटत होतं... पण म्हणतात ना हळूहळू अंगावर जबाबदारी वाढत जाते, तसे दोघांमधले प्रेम कमी होते. तसेच काहीच मानव आणि सायली बाबतीत झाले. आधी फक्त एकमेकांसाठी वेळ देणारे ते, आता त्यांचा वेळ वाटला गेला होता. छोट्या छोट्या गोष्टीमुळे दोघांमध्ये वाद होऊ लागले.. मग ते वाद आता घरच्यांच्याही नजरेत येऊ लागले, पण समजवणार कोणाला..? दोघांच्यात इगो कुटून भरला होता. त्यामुळे कोणीही माघार घ्यायला तयार नव्हते. त्याचं लेट नाईट कधीतरी उशिरा येणं, सायलीला पटत नव्हते तर मानवला तिचं कामानिमित्त बाहेर जाणं पटत नव्हते. भांडणाला आता त्यांना कारण लागत नव्हते. लग्नाआधी तो तिचे सगळे हट्ट पुरवत होता, पण लग्नानंतर त्याच्याकडून चुकून कधीतरी तिची हट्ट राहिले, तर तेही मनाला लावून त्याचाही उद्रेक होत होता. सासु सुनेमध्ये सुद्धा हळूहळू भांडणे वाढू लागली. सुरेखाताई तिला समजावून सांगत होत्या, पण तिला समजून घ्यायचं न्हवत. मानव आणि सायली आता मानसिकरित्या कमजोर पडत होते. कोणीही माघार घ्यायला तयार नव्हते. इगो आडवा येत होता. सायलीच्या आई-वडिलांना आपल्या मुलीची मनस्थिती बघून त्यांनी घरी येऊन या गोष्टीची शहानिशा लावली. त्यामुळे मानव भलताच चिडला. घरात सगळ्यांसमोर दोघेही एकमेकांवर आरोप लावत होते आणि सगळेजण थक्क होऊन दोघांकडे बघत होते... आणि हळूहळू दोघांचे एकमेकांवर लावणारे आरोप वाढतच गेले आणि एके ठिकाणी मानवचे पेशंस संपत गेले.. आणि त्याचा हात तिच्या कानशिलात पडला. त्याचबरोबर पूर्ण घरातलं वातावरण शांत झाले.