दुर्गा ... भाग 25

  " कडक !", आर्याने तिला बघून हातानेच सुंदर दिसतेय खुणावले आणि एक डोळा मारला. आता पूर्णपणे खट्याळ भाव त्याच्या चेहऱ्यावर जमा झाले होते . आतापर्यंत त्याला बघून भाऊक झालेली ती , त्याच्या अशा वागण्याने तिला खुदकन हसू आले . डोळ्यात अश्रू आणि ओठांवर हसू अशी अवस्था झाली होती तिची . आर्याने आपले दोन्ही हात तिला मिठीत घेण्यासाठी तिच्या पुढे पसरले . दुर्गाने आजूबाजूला बघितले तर सगळ्यांची तोंड विरुद्ध दिशेने होते. आणि आनंदाने दुर्गा आर्याच्या मिठीत शिरली . तिने त्याला अगदी घट्ट पकडून घेतले होते. त्याचा मिठीत आता ती एक पोलिस ऑफिसर आहे हे सुद्धा विसरली होती , दोन तीन वर्षाचा विरह होता , आणि तिला त्याचा मिठीत रडू कोसळले. त्याने सुद्धा एखाद्या लहान बाळाला मिठीत घ्यावे तसे तिला घेतले होते आणि तिच्या डोक्यावरून मायेने हात फिरवत होता . दुर्गाचे तिच्या देशावर खूप प्रेम होते , पण आर्या तिचा जीव की प्राण होता , तिच्या आयुष्यात सर्वात पहिले आणि सगळ्यात मोठं स्थान आर्याच होता. आर्या साठी ती काहीपण करू शकत होती , तिचं पहिलं प्रेम आर्याच होता.