दुसरी बाजू _ शब्दाविना _ भाग ३(अंतिम)

"अगं राधा मी लहानाचा मोठा झालो तो अशाच वातावरणात. आमचे सगळ्यांचे पण एकमेकांवर खूप प्रेम आहे आणि एकमेकांची काळजी पण वाटते. पण आम्ही कोणीच असं कधी बोलून दाखवत नाही. शिवाय मला जास्त नातेवाईक पण नाहीत. कुठे जास्त जाणं येणं नाही. त्यामुळे मला हे तुझ्यासारखे व्यक्त होणे जमत नाही. तुझ्या माहेरी तू अशा वातावरणात मोठी झाली म्हणून तुझ्याही तेच अंगवळणी पडलं आहे. मी प्रामाणिकपणे सांगतो मी हे जाणूनबुजून केलं नाही. राधा माझं तुझ्यावर खूप प्रेम आहे. तू मला बघता क्षणीच आवडलीस म्हणूनच मी तुला मागणी घातली आणि आता मी तुला वचन देतो की ह्या पुढे मी माझ्या वागणुकीत बदल करेन. तुला भावना व्यक्त केलेल्या आवडतात मी आता तसाच वागेन. तू पण मला वचन दे की यापुढे तुझ्या मनात जे काही येईल ते तू स्पष्टपणे मला बोलून दाखवशील. राग, लोभ, मत्सर सारं काही वेळच्यावेळी बाहेर आलेलं चांगलं असतं. नात्यात मोकळेपणा असायला पाहिजे. तुझं म्हणणं मला पटलं. पण जसे चांगल्या भावना बोलून व्यक्त करायच्या असतात तसेच एखादी न आवडलेली गोष्ट लगेच बोलून मोकळं व्हायचं. आता मनात अजिबात कटूता ठेवू नकोस."