दुसरी बाजू _ शब्दाविना _ भाग २

राधाचा आधीचा उत्साह आता काही अनुभवानंतर थोडा मावळला होता. आता ती स्वतःहून काही करायचं म्हणत नव्हती. तिच्या वागण्यातील बदल सर्वांना जाणवत होता. तरीही कुणीही म्हणजे अगदी शेखरनेही त्याची दखल घेतली नव्हती. तिच्या मनात येत होतं आपल्याला पाहून मागणी घालणारा शेखर इतका रुक्ष कसा वागू शकतो. तिला आपल्या दादा वहिनी मधील रोमँटिक वागणं खूप आवडायचं. दोघेही एकमेकांना खूप जपायचे. असं नाही की त्यांच्यात अगदीच भांडण होत नसे. पण ते झाल्यानंतर ते दोघं एकमेकांशी जास्तच प्रेमाने वागायचे. आई आणि बाबांच्या लग्नाला इतकी वर्ष झाल्यानंतरसुद्धा त्यांच्यातील प्रेम लोणचे जसं मुरल्यावर जास्त चविष्ट लागते त्याप्रमाणेच त्यांचे प्रेम दिवसागणिक जास्त मुरत जातं आहे. ते जरी हल्लीच्या तरुणाईप्रमाणे एकमेकांना सारखं सारखं आय लव्ह यू म्हणत नसले तरी त्यांच्या कृतीतून ते नेहमीच दिसत आलं आहे.