एक धागा सुखाचा..(भाग १०)

'पण मी का हा इतका विचार करत आहे? आज पहिल्यांदा एका मुलीसाठी मी आईशी वाद घातला, तिला दुखावलं. खरंतर एवढी हिंमतच नाहीये माझ्यात, पण हे सगळं बळ मग आलं कुठून? त्यात आता आई नाही म्हणतेय तर ठीक आहे ना. तसंही आयुष्यात लग्नच करायचं नाही हे मी आधीच ठरवलं होतं. मग आता का मला मनातून माझं आणि अर्पिताचं लग्न व्हावं असं वाटतंय? जर अर्पिताचा नकार असता या लग्नासाठी तर ठीक होतं, तेव्हा मात्र मी स्वतःहून दोन पाऊल मागे आलो असतो. पण आता तिचा होकार आलाय तेव्हापासून मी का मागे जाऊ शकत नाहीये? तसंही तिची इच्छा नाहीच आहे माझ्याशी लग्न करायची. ती आयुष्याची फक्त एक तडजोड म्हणून हे लग्न करत आहे. आज माझं आणि तिचं लग्न झालं नाही तर तिचे आईवडील दुसरा एखादा मुलगा शोधतीलच ना! पण मग हे सगळं माहीत असताना सुद्धा मी का गुंतत आहे तिच्यामध्ये?'