एका हाताने टाळी वाजत नाही.. २

अंजली आणि वेदांशी रोज नवनवीन विषय घेऊन एकमेकींशी वाद घालत होत्या. दिवसेंदिवस घरातलं वातावरण अजूनच दूषित होत होतं. आजूबाजूच्या बायकांना त्या दोघींचा वाद हा चर्चेचा विषय झाला होता. शेजारच्या बायकांत अंजली आणि वेदांशीचा भांडणाचा मुद्दा चवीने चघळला जाऊ लागला. काही बायका अंजलीच्या बाजूने तर काही वेदांशीच्या बाजूने होत्या. आणि त्या तिखट मीठ लावून दोघींचे कान भरत होत्या. त्यांना काय! तितकीच करमणूक.. तोंडावर वाईट वाटतंय असं दाखवत मागून त्यांचीच निंदा करत होत्या. समीर आणि त्याची आई अंजली आणि वेदांशीला सारखं सारखं समजावून कंटाळले होते. दोघीही आपली बाजू मांडत आणि स्वतः कशी बरोबर आणि समोरची कशी चुकीची हेच सांगत होत्या. काय करावं समजत नव्हतं; पण त्या दिवशीच्या त्या प्रसंगामुळे मात्र अंजलीच्या सासूबाईंनी त्या दोघींचीही चांगलीच कानउघडणी केली.