एकच क्षण अधःपतनाचा.. भाग ४

अवनीला हवे होते तेच शेवटी झाले होते. ती गरोदर होती. सुजय फारच आनंदात होता. शेवटी त्याचे बापपण सिद्ध झाले होते. दोघांच्या कुटुंबात आनंदाची लहर पसरली. मग अवनीची चोरओटी, डोहाळजेवण सगळेच चालू होते. अवनीही ते सगळे लाड करून घेत होती. नऊ महिने पूर्ण झाले आणि अवनीने एका छानशा गुटगुटीत बाळाला जन्म दिला. बाळाचे बारसे झाले. त्याचे नाव सुजयने आदित्य ठेवले. बारशाला खूप लोकं आली होती. खूप आहेर आला होता. त्यात डोळ्यात भरणारा होता आकाशचा. सोन्याची चेन, अंगठी, छोटेसे ब्रेसलेट आणि खूप सारी खेळणी.