एकमेकांना समजून घ्या ना _ भाग २

शुभ्रा आणि सुलुताई मध्ये जवळजवळ सोळा वर्षांचे अंतर होतं. सुलुताईच्या लग्नात ती शाळेत होती. ताईचं लग्न झालं तेव्हापासून ती अनेक वेळा तिच्याकडे राहायला जायची त्यावेळी भाऊजी तिचे खूप लाड करायचे. भाऊजी म्हणजे तिच्यासाठी एक आदर्श होते. जीवनात प्रगती कशी करायची ते त्यांनीच तिला समजावून सांगितलं होतं. कॉलेजमध्ये प्रवेश घ्यायची वेळ आली तेव्हा त्यांनीच तिला तू कॉमर्सला जा असा सल्ला दिला होता म्हणजे नोकरी मिळणे सोपे जाईल. थोडक्यात भाऊजी तिला खूपच प्रिय होते. पूजा सुरू झाली आणि ती संपेपर्यंत तेवढा वेळच शुभ्रा शांत होती. बाकी तिची धुसफूस चालूच होती. तिची बहीण, मावशी कोणीही समोर आली तरी ती पुन्हापुन्हा तेच बोलत होती.